శ్రీకాకుళం: గున్న ఏనుగుతో సెల్ఫీలు.. తల్లి ఏనుగు కోపానికి అమాయకుడు బలి

సుర్లా–స్వర్ణాపురం తీరంలో స్థానిక బాహుదానదిని ఏనుగుల గుంపు దాటుతుండగా ఓ చిన్న ఏనుగు గుమ్మిలో చిక్కుకుపోయింది. ఈ విషయాన్ని గమనించిన స్థానిక యువకులు దాన్ని ఒడ్డుకు తీసుకొచ్చి సెల్ఫీలు దిగారు.

 

ఏపీ-ఒడిశా సరిహద్దులో ఏనుగులు గుంపు సందడి చేసింది. సుర్లా–స్వర్ణాపురం తీరంలో శ్రీకాకుళం జిల్లా ఇచ్ఛాపురం మండలం కేశుపురం, బూర్జపాడు, లక్ష్మీపురం గ్రామ పరిసరాల్లో మూడురోజులుగా ఏనుగుల గుంపు ఒడిశా వైపు వెళ్లింది. సుర్లా–స్వర్ణాపురం తీరంలో స్థానిక బాహుదానదిని ఏనుగుల గుంపు దాటుతుండగా ఓ చిన్న ఏనుగు గుమ్మిలో చిక్కుకుపోయింది. ఈ విషయాన్ని గమనించిన స్థానిక యువకులు దాన్ని ఒడ్డుకు తీసుకొచ్చి సెల్ఫీలు దిగారు. కొద్దిసేపు గున్న ఏనుగుతో సరదాగా గడిపారు.

కొద్దిసేపటి తర్వాత తల్లి ఏనుగు మాత్రం కోపంగా వెనక్కి తిరిగి వచ్చింది. భయంతో ఆ యువకులు పరుగులు తీశారు. అదే సమయంలో నదిలో చేపలు పడుతున్న ఒడిశా యువకుడు ఏనుగు రాకను గమనించకపోవడంతో అక్కడే ఉండిపోయాడు. తల్లి ఏనుగు అతడిపై దాడి చేసింది.. కిందపడేసి తొక్కబోయింది. అక్కడే ఉన్న యువకులు, స్థానికులు ఏనుగును తరిమేశారు. ఈ దాడిలో యువకుడు తీవ్రంగా గాయపడ్డాడు.. స్థానికులు వెంటనే ఆస్పత్రికి తరలించారు. ఈ సీన్ మొత్తాన్ని కొందరు వీడియో తీశారు.